گورنمنٹ سپیشل ایجوکیشن سنٹر مریدکے میں تقریب، ایم پی اے چودھری خرم اعجاز چٹھہ کی خصوصی شرکت
گورنمنٹ سپیشل ایجوکیشن سنٹر مریدکے میں اہلِ خیر کے اعزاز میں ایک باوقار تقریب منعقد ہوئی۔ ایم پی اے چودھری خرم اعجاز چٹھہ، ڈی ای او سپیشل ایجوکیشن طاہر حسین غازی مہمان خصوصی تھے۔ چودھری خرم اعجاز نے اپنی آمد کے فوراً بعد خصوصی بچوں کیلیے مختص سکول بس کا معائنہ کیا جسے سکول اور شہریوں کے مالی تعاون سے از سرِ نو فنکشنل بنایا گیا ہے۔ ریسورس روم میں تقریب کاآغاز تلاوت اور سکول کے بچوں کی پڑھی نعت شریف سے ہوا۔ جس کے بعد ہیڈ مسٹریس محترمہ روبینہ شاہین نے مہمانوں کو خوش آمدید کہا۔ ڈی ای او طاہر حسین غازی نے ضلع بھر میں سکول کی شاندار کارکردگی پر سنٹر انتظامیہ کو مبارکباد دی نیزعوام سے اپیل کی کہ وہ اپنے خصوصی بچوں کو لازمی طور پر سپیشل ایجوکیشن سنٹر میں داخل کرائیں تاکہ منظم طریقے سے ان کی تعلیم و تربیت کا آغاز ہو۔ کرامت علی بھٹی سنٹر و شہر میں بہتری کے عمل میں تسلسل اور اس کے حجم میں بتدریج پھیلاؤ کے مثبت رجحان پر بولے۔ تقریب میں سی ای او تنویر سالٹ سید فراز ثقلین بخاری، سی ای او انوار کارپوریشن بلال انوار اور صدر فٹبال اکیڈمی غلام محی الدین کو سماجی شعبہ میں عمدہ خدمات اور تعاون پر "اہلِ خیر ایوارڈ" سے نواز گیا۔ چودھری خرم اعجاز چٹھہ نے خطاب سے پہلے عمدہ تعلیمی کارکردگی پر بچوں میں ایوارڈز اور سرٹیفیکیٹ بانٹے۔ میڈم روبینہ شاہین، میڈم ریحانہ یاسمین، سی ای او تنویر سالٹ سید فراز ثقلین نقوی بخاری، صدر فٹبال اکیڈمی غلام محی الدین، اراکینِ سکول مینجمنٹ کونسل محترمہ عنبرین سجاد اور میڈم صائمہ نے چودھری خرم اعجاز کا ہاتھ بٹایا۔ چودھری خرم اعجاز نے بعد ازاں اپنے خطاب میں سکول انتظامیہ کو شاندار پروگرام اور بہتری کیلیے انتھک کاوشوں پر مبارکباد پیش کی۔ انہوں نے سنٹر و شہر میں ترقیاتی سرگرمیوں کا تفصیل سے تذکرہ کیا اور "دلکش مریدکے" کے نام سے مین جی ٹی روڈ کے دونوں اطراف خوبصورتی سے متعلق منصوبے کا بتایا جس کے لیے موجودہ بجٹ میں 60 کروڑ روپے مختص کیے گئے ہیں۔ عوامی نمائندے نے بتایا کہ مزید 25 کروڑ حلقہ کے اندر روڈ نیٹ ورک کو بہتر بنانے پر خرچ ہونگے جبکہ 30 کروڑ سے گلیاں بازار اور سیوریج سسٹم ٹھیک کروایا جائیگا۔ چودھری خرم نے مریدکے میں انٹرنیشنل لیول کے فٹبال سٹیڈیم کی تعمیر کیلیے 15 کروڑ روپے، گورنمنٹ ڈگری کالج فار بوائز کیلیے 5 کروڑ روپے کے ترقیاتی کاموں کے جلد شروع ہونے کی خوشخبری دی نیز سپورٹس کمپلیکس، گرلز ڈگری کالج سے متعلق مثبت پیش رفت کا تذکرہ کیا۔ انہوں نے سپیشل ایجوکیشن سنٹر کے تمام مسائل اور ضروری فنڈز کے اجراء کیلیے بھی اپنے بھرپور تعاون کا یقین دلایا۔ اس موقع پر سکول کے بصارت سے محروم استاد محمد نعیم نے ایک سپیشل بچے کیلیے وہیل چیئر عطیہ کی جبکہ ڈی ای او صاحب نے دس وہیل چیئرز اور آلاتِ سماعت کی فراہمی کا اعلان کیا۔ چودھری خرم نے تقریب کے اختتام پر فٹبال اکیڈمی کے نمائندہ وفد سے ملاقات کی اور انٹرنیشنل لیول کے فٹبال سٹیڈیم کی تعمیر سے متعلق پراجیکٹ پر تفصیل سے بات کی۔ غلام محی الدین کی زیرِ قیادت وفد میں نامور طبیب حکیم ملک مشتاق احمد، معروف یوگی عامر صدیق چودھری، قومی فٹبالر محمد راشد، رانا عامر جمشید، شکیل چشتی و دیگر افراد شامل تھے۔ تقریب میں سکول اساتذہ، خصوصی بچوں کے والدین، مقامی شہریوں اور خواتین نے بھرپور شرکت کی۔
No comments:
Post a Comment